Psa 32 | KYG | STEP | Goti'a ke'aepa ge'amo amagi'a atale'naya kava'apimo alino atalege hosu kava'apimo aeno ati kaeno atalege hu'nisiya vaya'mogimo Goti aulagale'mo alagepa hu'a mai'nayanage'a afa'a apamogaga aigae.

Psalms 32

Hosu kava'ae'mo aeno hakalo huno ha pai'niya gemae

1 Goti'a ke'aepa ge'amo amagi'a atale'naya kava'apimo alino atalege hosu kava'apimo aeno ati kaeno atalege hu'nisiya vaya'mogimo Goti aulagale'mo alagepa hu'a mai'nayanage'a afa'a apamogaga aigae. 2 Goti'a hosu kava'apimo hane'niye, huno nosige'a humi nami kava'mo osu'naya vaya'mogimo Goti aulagale'mo alagepa hu'a mai'nayanage'a afa'a apamogaga aigae. 3 Nagaemo hosu kava'nie'mo ae'na hakalo osu'ne'nae'mo avi'ya huge huge hu'na mai'nogeno lokiya'nimo ago hano hu'niye. 4 Ani kava hu'na mai'nogekae'mo feluga'e hani'ilaga'e'mo kana ya'mo alika nami'nanageno'ae'mo amuko nehiya afina'mo ani'mo leno nelaneya kava huno lokiya'nimo ago hano hu'niye. 5 Ani afina'mo hosu kava'nie'mo ae'na hakalo hu'na kaha pai'nova afina'mo hosu kava'nimo ae'na ati okae'nove. Nagaemo, ke'aepa gekamo ago amagi'na atale'nova kava'nie'mo Ala kava ne'mogae'mo ae'na hakalo hu'na kaha paiguve, hu'na hu'nogekae'mo hosu kava'nimo ago alika atale'nane.

6 Ani kava nehana'mofe'mo muki kakame nehaya vaya'mogimo kahauya hu'a kagesaya afina'mo nunumu hiyo. Ani'mo heno'ae'mo hapaopale'mo o'megaiye. 7 Kagaepi'mo e'na fala ki'nisugekae'mo hanageke ya'mo o'alisuvafe'mo yagaika nategane. Kagaemo nagufamo alika katika natesana yokemo nehisugekae'mo faika ku aika yagaika nategane.

8 Goti'a huno'ae'mo, nagaemo visana ka'mo alagepa hu'na ali'na kaya malete'na ali'na kave liguve, huno hu'niye. Naulagaleti'mo visana ka'mo ali'na kave liguve. 9 Hosimogi apakesamo o'afi'nage'a vaya'mogige'mo ge'apimo afisayafe'mo apavayafi'mo aenimo atete'a nofi aete'a yagai'a apate'ne'a ali'a api ai'a ne'apatae. Hosigana hutapa o'maiyo. 10 Hosu vaya'mo lusi kava hu'a kana ya'mo aligaya'monanafa Ala kava nefe'mo apakesamo ne'afiya vaya'aife'mo hau huno ne'apateya kava'amo'mo yagaino ku aino apategaiye. 11 Alagepa vaya'mogitapae, hu'na, Ala kava nefeke'mo lapamogaga aitetapa amuse hiyo. Ge'amo akame nehaya vaya'mogitapae, hu'na, lapamogaga ne'aitapae'mo alopa gefati'mo hiyo.